បទល្មើសនេសាទខុសច្បាប់កើតពេញបន្ទុកក្នុងស្រុកចំនួន៣ ខេត្ដបាត់ដំបងមន្រ្តីជំនាញបើកភ្លើងខៀវ

វិធានការបង្ក្រាបក្រុមឈ្មួញដែលបានប្រើប្រាស់ឧបករណ៍ខុសច្បាប់ប្រមូល ផលត្រីក្នុងរដូវបិទនេសាទត្រីពងកូនមិនសូវមានប្រសិទភាពនៅឡើយទេ បើទោះមានបទល្មើស ទ្រង់ទ្រាយធំបែបណាក៏ដោយ ។

សកម្មភាពរបស់ឈ្មួញប្រើប្រាស់ឧបករណ៍ល្មើសច្បាប់កើតមានពេញបន្ទុក នៅក្នុងភូមិសាស្ដ្រស្រុកឯកភ្នំ ស្រុកសង្កែ និងស្រុកមោងឫស្សី ដូចជាការដាក់លបនរ៉ាវជាដើមក្នុង១កន្លែងៗ យ៉ាងតិចមានប្រវែងពី៥០០-១.០០០ម៉ែត្រ ហើយក្នុង១ស្រុកៗ មិនតិចជាងពី២០-៥០កន្លែងដែលប្រជាពលរដ្ឋស្ដីបន្ទោសទៅលើអាជ្ញាធរ សមត្ថកិច្ចពិសេសជំនាញរដ្ឋបាលជលផលថា បានឃុបឃិតជាមួយ ក្រុមឈ្មួញ ប្រើឧបករណ៍ល្មើសច្បាប់ ក្នុងរដូវបិទនេសាទ។

លោក ជួង សុភា នាយខណ្ឌរដ្ឋបាលជលផលស្ដីទីខេត្ដបាត់ដំបងបានឱ្យដឹងតាមទូរស័ព្ទថា លោកនឹងដឹកនាំ កម្លាំងចុះទៅបង្ក្រាបក្នុងអំឡុង២-៣ថ្ងៃខាងមុខនេះប៉ុន្ដែនាយ ខណ្ឌរដ្ឋបាលរូបនេះមិនបានបញ្ជាក់ទេថាមានមន្ដ្រីរដ្ឋបាលជលផល ណាមួយដែលពាក់ព័ន្ធអំពើពុករលួយឃុបឃិតជាមួយឈ្មួញ ។

មន្ដ្រី រដ្ឋបាលជលផលក្នុងស្រុកឯកភ្នំ ស្រុកសង្កែនិងស្រុកមោងឫស្សីប្រសិនបើមិនមានវិធានការទប់ស្កាត់ បទល្មើសប្រើប្រាស់ឧបករណ៍ខុសច្បាប់ប្រមូលផលត្រីទាំងនោះទេគឺត្រី ទាំងនោះនឹងត្រូវវិនាសហិនហោចជាក់ជាមិនខានឡើយ។

ប្រជាពលរដ្ឋនៅក្នុងស្រុកខាងលើបានរិះគន់ថា មន្រ្តីជំនាញគេថាផ្សេង តែធ្វើផ្សេង មាត់ថាបង្រ្កាបបទល្មើស តែហេតុអ្វីបទល្មើសចេះតែកើតមានមិនចេះចប់មិនចេះហើយបែបនេះ ពួកគាត់សង្ស័យថា ខ្លាចតែមាត់ថា បង្រ្កាបតែ ដៃលូកយកលុយដាក់ហោប៉ៅផ្ទាល់ខ្លួនទេដឹង?