ដំណឹងផ្លាស់ប្តូរតំណែងលោក​ទូច​ណា​រ៉ុថស្នងការរាជធានីភ្នំពេញ

អ្នកនាំពាក្យ​ប៉ូលិស​ជាតិ របស់​ក្រសួង​មហាផ្ទៃ បាន​បដិសេធ​នូវ​ដំណឹង ដែល​ផ្សព្វ​ផ្សាយ​ថា មាន​ការផ្លាស់ប្តូរ​តំណែង​លោក ទូច ណារ៉ុថ ចេញពី​ស្នងការ​រាជធានី​ភ្នំពេញ​ រហូតដល់​ម៉ោង ១២ ថ្ងៃត្រង់ ថ្ងៃទី​២៩ ខែ​កញ្ញា ឆ្នាំ​២០១២ អគ្គស្នងការដ្ឋាន​នគរបាល​​ជាតិ មិនទាន់​មាន​ដំណឹង​ពី​សេចក្តីសម្រេច​ផ្លាស់ប្តូរ​តំណែង​ដ៏​គួរឲ្យ​ភ្ញាក់​​ផ្អើល​​នោះ​ទេ​។​

លោក​ឧត្តមសេនីយ៍ឯក គៀត ចន្ទ​ថា​រិទ្ធ នាយសេនាធិការ និង​ជា​អ្នកនាំពាក្យ​អគ្គស្នង​ការ​នគរបាល​ជាតិ បាន​ឲដឹងថា នៅ​រសៀល​ថ្ងៃ​ទី​២៩ ខែ​កញ្ញា ឆ្នាំ​២០១២ ថា "​មាន​អ្នកកាសែត​សួរ​ខ្ញុំ​ពី​រឿង​នេះពី​បី​បួន​នាក់​ហើយ​។ ខ្ញុំ​មិនដឹងថា ខាង​កាសែត​ផ្សព្វផ្សាយ​ដំណឹង​នៃ​ការផ្លាស់ប្តូរ​ស្នងការ​រាជធានី​ភ្នំពេញ បាន​ប្រភព​ពី​ណា​ទេ​?​។ ខ្ញុំ​អត់​មាន​ឮ​ថ្នាក់ដឹកនាំ​អី និយាយ ឬក៏​ថា មាន​ប្រភព​មកពីណា ឲ្យ​ជឿ​បាន​ទេ​។ ខ្ញុំ​ក៏​មាន​ការភ្ញាក់ផ្អើល​ដែរ នៅពេល​កាសែត​សួរ​ខ្ញុំ​ពី​រឿង​នេះ​"​។​ 

​កាសែត​រាយការណ៍​ថា សេចក្តីសម្រេច​នេះ ត្រូវបាន​ធ្វើឡើង​កាលពី​ថ្ងៃ​សុក្រ ទី​២៨ ខែ​កញ្ញា ឆ្នាំ​២០១២ ដោយ​សម្តេច​តេជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា តាម​សំណើ​របស់​ឧបនាយករដ្ឋមន្ត្រី រដ្ឋមន្ត្រីក្រសួង​មហាផ្ទៃ លោក ស ខេង​៕