ស្រះចិញ្ចឹមត្រីឆ្តោខុសច្បាប់ចំនួន៥ និងស្រះចិញ្ចឹមត្រីប្រា១ ក្នុងភូមិតាជេត ឃុំសំរោងយា ស្រុកពួក ខេត្តសៀមរាប ត្រូវបានធ្វើការបង្ក្រាបនៅព្រឹកថ្ងៃទី២៦ម្សិលមិញ ដោយកម្លាំងចំរុះដែលចូលរួមដោយលោក អ៊ុំអមរា ស្នងការរងខេត្ត លោក សឿនសេន នាយការិយាល័យប្រឆាំងបទល្មើសសេដ្ឋកិច្ច លោកសំផាន់ណា នាយរងផ្នែករដ្ឋបាលជលផលក្រឡាញ់ រួមជាមួយអាជ្ញាធរដែនដី ដែលបញ្ជាផ្ទាល់ពីលោក ទីសុវិនថាល់ ព្រះរាជអាជ្ញាសាលាដំបូងខេត្តសៀមរាប និងដឹកនាំកម្លាំងដោយលោក សំរិទ្ធសុខុន ព្រះរាជអាជ្ញារង។
ដើមហេតុដែលឈានទៅដល់ការចុះបង្ក្រាបខាងលើនេះ គឺដោយសាបងប្អូនប្រជាពលរដ្ឋនៅឃុំខាងលើបានរាយការណ៍ប្រាប់អ្នកសារព័ត៌ថា រយៈពេល២ឆ្នាំកន្លងទៅនេះពួកគាត់មានទុក្ខលំបាក២ករណីដោយសារតែស្រះចិញ្ចឹមត្រីនេះគឺ ទី១-ម្ចាស់ស្រះបិតទឹកដើម្បីបង្ហូរចូលស្រះរបស់ខ្លួនដែលនាំអោយលេចស្រែអ្នកនៅលើទឹក ទី២-ម្ចាស់ស្រះបានបង្ហូរទឹកស្អុយទំលាក់ទៅអ្នកនៅខាងក្រោម ប៉ះពាល់ពលរដ្ឋរាប់រយគ្រួសារ។
តាំងពីព្រឹករហូតដល់រសៀលម្សិលមិញប្រជាពលរដ្ឋបាននាំគ្នាសាទរ និងនាំគ្នាមករាយការណ៍បន្ថែមជូនសមត្ថកិច្ចថា ទឹកស្អុយដែលហូរធ្លាក់ចូលតាមអូរ តាមប្រឡាយ ហូរចូលក្នុងស្រែដែលបណ្តាលអោយងាប់ សំណាប សន្ទុង របស់កសិករក្នុងឃុំនេះរយះពេល២ឆ្នាំហើយ។ ពួកគាត់បន្តថា ពេលគេបង្ហូរទឹកស្អុយដាក់ស្រែស្រូវរបស់ពួកគាត់ គឺផ្តល់ផលអាក្រក់ដូចជា រមាស់ជើងរមាស់ដៃពេលចុះស្ទុង ជាពិសេសនោះគឺក្លិនស្អុយអាសោចបក់បោកតាមខ្យល់ធ្វើអោយពលរដ្ឋប៉ះពាល់ដល់សុខភាពអ្នករស់នៅជុំវិញនោះគ្រប់ៗក្រួសារ។ ពលរដ្ឋបន្ថែមថា ជារៀងរាល់ថ្ងៃគាត់ឃើញមានឡានកូរ៉េ២-៣គ្រឿងដឹកត្រីនុយតូចៗរាប់សិបតោន យកមកអោយត្រីឆ្តោខាងលើស៊ី ដែលពួកគាត់បារម្ភណ៍ថា បើចាប់ត្រីតាំងពីតូចបែបនេះអស់ហើយនោះ តើត្រីនៅបឹងទន្លេសាបអាចសល់ទៀតទេ មានតែរលាយតែប៉ុណ្ណោះ។
សមត្ថកិច្ចពុំទាន់អាចវែកមុខថៅកែចិញ្ចឹមត្រីឆ្តោនេះបានទេ តែមានមេការម្នាក់ ឈ្មោះ វ៉ាងវណ្ណៈ ភេទប្រុស អាយុ២៣ឆ្នាំ បានចេញមុខអះអាងថា គេជាមេការស៊ីឈ្នួលទើបតែបានជាង២ខែប៉ុណ្ណោះ ហើយគេមិនស្គាល់ឈ្មោះថៅកែ និងមិនស្គាល់លេខទូរស័ព្ទទំនាក់ទំនងទេ។
បើយោងតាមសម្តីប្រជាពលរដ្ឋ និងអាជ្ញាធរដែនដី បានអោយដឹងថា ថៅកែស្រះចិញ្ចឹមត្រីឆ្តោខាងលើ គឺមានម្ចាស់ជាជនជាតិវៀតណាម ឈ្មោះ លោកដាង លោកវ៉ាង និងលោកចាន់។ ពួកគាត់អោយដឹងទៀតថា ម្ចាស់ដីស្រះខាងលើនេះ ឈ្មោះលោក ជាសុភឿត ដែលជាអ្នកមានទ្រព្យសម្បត្តិស្កុកស្តម ហើយមានខ្នងធំសុទ្ធតែខ្សែឧកញ្ញ៉ានៅខេត្តសៀមរាបនេះ ទើបជាហេតុមិនមានសមត្ថកិច្ចណាហ៊ានមកក្បែរស្រះចិញ្ចឹមត្រីខាងលើនេះ។
នៅពេលអ្នកយកព័ត៌មានយើងទូរស័ព្ទសុំការបំភ្លឺពីលោកជាសុភឿតនៅព្រឹកម្សិលមិញ លោកបានជេរអ្នកកាសែតថា ”ពួកអាអ្នកកាសែតឯងកុំប៉ិន រមាស់ដៃរមាស់ជើងពេក ឆ្នាំមុនអញ់ចិញ្ចឹម១ឆ្នាំគ្មានអាណាវាថា ស្អុយ ពួកអាឯងល្មមៗបានហើយ“ រួចបិតទូរស័ព្ទបាត់ទៅ។
លោក មៀលរ៉ា មេភូមិតាជេត បានអោយដឹងថា លោកធ្លាប់បានសរសេររបាយការណ៍ដាក់ទៅក្រុមប្រឹក្សាឃុំអំពីសំណើរនិងទុក្ខលំបាករបស់ប្រជាពលរដ្ឋខាងលើ តែរហូតមកដល់ពេលនេះស្ងាត់ឈឹង មិនមានការអន្តរាគមសោះ ចំពោះការបង្ហូរទឹកស្អុយនេះ។
នៅរសៀលដដែលបន្ទាប់ពីសមត្ថកិច្ចបញ្ចប់ការធ្វើកំណត់ហេតុ លោកសឿនសេន បានប្រាប់អ្នកយកព័ត៌មានយើងថា លោកនិងបញ្ជូនសំណុំរឿងនេះ ទៅអោយខាងរដ្ឋបាលជលផល ជាអ្នកចាត់ការបន្ត និងរងចាំបញ្ជារបស់លោកព្រះរាជអាជ្ញាថាត្រូវធ្វើយ៉ាងណាបន្តទៀត។ លោបន្តថា វត្ថុតាង លោកបានប្រគល់អោយមេការឈ្មោះ វ៉ាងវណ្ណៈ ជាអ្នកទទួលខុសត្រូវ មើលថែរក្សាទុកមិនអោយប៉ះពាល់ បើមានការចាប់ត្រីចេញ ឬបាត់បង់ត្រីដោយប្រការណាមួយនោះ ឈ្មោះ វ៉ាងវណ្ណៈ ជាអ្នកទទួលខុសត្រូវចំពោះមុខផ្លូវច្បាប់។
ប្រជាពលរដ្ឋក្នុងឃុំខាងលើសំនូមពរទៅ សមត្ថកិច្ចពាក់ពាន់ មន្រ្តីជំនាញ ជាពិសេសលោក ទីសុវិនថាល់ ព្រះរាជអាជ្ញាសាលាដំបូងខេត្តសៀមរាប មេត្តាឆាប់ចាប់កូនត្រីឆ្តោក្នុងស្រះនេះប្រលេងទៅក្នុងបឹងទន្លេសាបទៅ ព្រោះបើទុកយូរខ្លាចម្ចាស់ស្រះលួចចាប់ដឹកចល័តចេញអស់ និងម្យ៉ាងទៀតកុំអោយពួកគេបំពុលបរិស្ថានប៉ះពាល់ប្រជាពលរដ្ឋបន្តទៅទៀត៕
.jpg)
.jpg)
.jpg)
.png)
.jpg)
.jpg)
.jpg)
