តំណាង​ជនជាតិដើម​ភាគតិច នៅ​កម្ពុជា ជួប​អ្នកកាសែត បង្ហាញ​ពី​ប្រវត្តិ​ជនជាតិដើម​

ក្រុម​តំណាង​ជនជាតិដើម​ភាគតិចនៅ​កម្ពុជា បាន​ជួបជុំ​​ជា​​មួយ​អ្នកកាសែត ក្នុង​សន្និសីទ​កាសែត​មួយ នៅ​ព្រឹក​ថ្ងៃទី​១១ ខែ​ធ្នូ ឆ្នាំ​២០១២ នៅ​មេ​តា ហ្វោ​វ ទល់មុខ​អគារ ប៊ូ​ឌី​ញ បៀ​លប្រាយ ក្នុង​រាជធានី​ភ្នំពេញ​។ តំណាង​ក្រុម​ជនជាតិដើម​ភាគតិច បាន​លើក​បង្ហាញ​ពី​ប្រវត្តិ​ជនជាតិដើម​ភាគតិច នៅក្នុង​ប្រទេស​កម្ពុជា​ ដែលសរុបមានជិត ២សែននាក់ មានចំនួន ២៤ ក្រុម រស់នៅក្នុង ១៤ ខេត្តនៅតំបន់ព្រៃភ្នំ។​

ថ្ងៃទី 11 ធ្នូ 2012 ដោយ: លី សិលា CEN

លោក ភាព សុជា ប្រធាន​អង្គការ​យុវជន​ជនជាតិដើម​ភាគតិច​កម្ពុជា ដែល​ជា​ជនជាតិ​ព្នង បាន​ថ្លែងថា សន្និសីទកាសែតនា​ព្រឹក​នេះ មាន​គោលបំណង​ធំ​២ គឺ​ទី​១-​បង្ហាញ​ពី​បរិបទ​ជនជាតិដើម​ភាគតិចនៅ​កម្ពុជា ឲ្យបាន​ច្បាស់ និង​កាន់តែ​ស៊ី​ជម្រៅដល់​សាធារណជន ដើម្បី​បញ្ចៀស​នូវ​ផ្នត់គំនិត​អវិជ្ជមាន ដែល​នាំឲ្យ​មាន​ការប្រកាន់ និង​ការរើសអើង​ពូជសាសន៍ ជាពិសេសដើម្បី​ឆ្លៀតឱកាស​ឆ្លុះបញ្ចាំង និង​បកស្រាយ​លើ​ផ្នត់គំនិតនៃ​ការយល់​ខុសលើ​ជនជាតិដើម​ភាគតិច ជាពិសេស​ជនជាតិ​ព្នង​។ គោល​បំណង​ទី​២-​ដើម្បី​អំពាវនាវ​ឲ្យ​សាធារណជន យល់ដឹង​ពី​ប្រពៃណី​ ទំនៀម​ទម្លាប់​របស់​ជនជាតិដើម​ភាគតិច​កម្ពុជា ជាពិសេស​ជនជាតិ​ព្នងនៅ​ប្រទេស​កម្ពុជា​។​

តំណាង​ជនជាតិដើម​ភាគតិច ក៏​បាន​រំពឹងទុក​ថា តាមរយៈ​សន្និសីទ​កាសែត​នេះ ផ្នត់គំនិត​អវិជ្ជមាន​ចំពោះ​ជនជាតិដើម​ភាគតិច ត្រូវ​បាន​បកស្រាយ និង​បង្ហាញ​ដោយ​ជនជាតិដើម​ភាគតិច និង​បណ្ឌិត​ប្រវត្តិសាស្ត្រ​។ ក្នុងនោះ​ប្រពៃណី​ ទំនៀម​ទម្លាប់​ជនជាតិដើម​ភាគតិច នឹង​ត្រូវបាន​ផ្សព្វផ្សាយ​យ៉ាង​ទូលំទូលាយ​។​

ជា​ការកត់សម្គាល់ សន្និសីទកាសែត​របស់​ជនជាតិដើមភាគតិចនៅ​កម្ពុជានាពេលនេះ បាន​ធ្វើឡើងក្រោយពី​អ្នកតំណាងរាស្ត្រ​របស់​គ​ណ​បក្ស​ប្រជាជន​កម្ពុជា លោក ឈាង វុន បាន​ប្រើ​ពាក្យ​ប្រមាថ មាក់ងាយ​លើ​ក្រុម​ជនជាតិភាគតិចព្នង ថាជា​ក្រុម​អ្នក​មិន​មាន​ច្បាប់ទម្លាប់ និង​ច្រឡោ​ង​កោងកាច ជាដើម​។​

លោក ឈាង វុន បាន​ថ្លែង​ដូច្នេះ ដោយ​លោក​បាន​ប្រដូច​ក្រុម​អ្នកតំណាងរាស្ត្រ​គណបក្ស​​សមរង្ស៊ី និង​គណបក្ស​សិទ្ធិមនុស្ស ទៅ​នឹង​ក្រុម​ជនជាតិព្នង ដោយសារ​តែ​អ្នកតំណាងរាស្ត្រ​គណបក្សប្រឆាំង​ទាំង​នោះបាន​ដើរចេញ​ពី​កិច្ចប្រជុំ​រដ្ឋសភា ខណៈ​ដែល​លោក​តំណាងរាស្ត្រ ឈាង វុន បាន​ឡើង​ថ្លែង​ក្នុង​កិច្ចប្រជុំ​រដ្ឋសភា កាលពី​ថ្ងៃ​ទី​១៤ ខែវិច្ឆិកា ឆ្នាំ​២០១២​។​

​ភ្លាមៗ​នោះ នាំឲ្យ​មាន​ប្រតិកម្ម​ខ្លាំង​ក្លា​ពី​ក្រុម​ជនជាតិដើម​ភាគតិច ទាមទារ​ឲ្យ​លោក ឈាង វុន ធ្វើការ​សុំទោស​ចំពោះ​ការប្រមាថ​ជនជាតិ​ព្នង​។​

​តាមរយៈ​កិច្ចប្រជុំ​រដ្ឋសភា កាលពី​ថ្ងៃ​ទី​៦ ខែ​ធ្នូ ឆ្នាំ​២០១២ បាន​ថ្លែង​សុំ​អធ្យាស្រ័យ ចំពោះ​កំហុសឆ្គង​ដោយ​អ​ចេតនា​របស់​លោក លើ​ជនជាតិ​ព្នង​។ ក៏ប៉ុន្តែ​បងប្អូន​ជនជាតិ​ព្នង នៅ​តែ​ទាមទារ​ឲ្យ​លោក ឈាង វុន ធ្វើការ​សុំទោស​ដល់​ជនជាតិដើម​ភាគតិច នៅឯ​ភ្នំ​ដោះ​ក្រមុំ នៅឯ​ខេត្ត​មណ្ឌលគិរី​៕​