CCHR ផ្តល់​អនុសាសន៍​ឲ្យរដ្ឋាភិបាល​អាណត្តិថ្មី បង្កើត​ទូរទស្សន៍​ជាតិ​ឯករាជ្យ​មួយ

មជ្ឈមណ្ឌលសិទ្ធិមនុស្សកម្ពុជា(CCHR) ផ្តល់អនុសាសន៍ទៅរដ្ឋាភិបាលកម្ពុជា អាណត្តិថ្មី ក្នុងការបង្កើតប្រព័ន្ធផ្សព្វផ្សាយជាតិឯករាជ្យមួយ ដើម្បីធានាថា ពលរដ្ឋទ​ទួលបាន​ព័ត៌មាន​ពិតប្រាកដនិងធានាការបោះឆ្នោតប្រព្រឹត្តទៅដោយ សេរី និងយុត្តិធម៌។

អនុសាសន៍ទាក់ទងនឹងការបង្កើតប្រព័ន្ធ ផ្សព្វផ្សាយជាតិឯករាជ្យនោះ មាន នៅក្នុងអនុសាសន៍ចំនួន១០ចំណុច ដែលCCHR ដាក់ក្នុងកំណត់ត្រាសង្ខេប និងត្រូវបានចេញផ្សាយនៅថ្ងៃទី ១០ ខែកញ្ញាកន្លងទៅនេះ។

CCHR លើកឡើងថា ខ្លួនគាំទ្រនូវការបង្កើតប្រព័ន្ធផ្សព្វផ្សាយព័ត៌មានជាតិ ឯករាជ្យមួយ ដោយលុបចោលច្បាប់ណាដែលមាន លក្ខណៈរឹតបណ្តឹងទៅលើខ្លឹមសារ និង បង្កើតស្ថាប័នគ្រប់គ្រងការចាក់ផ្សាយ ឯករាជ្យមួយ ទទួលខុសត្រូវចំពោះការចេញអាជ្ញាប័ណ្ណ និងធានាឲ្យបានថាស្ថានីយផ្សព្វផ្សាយព័ត៌មាននោះ បំពេញការងារ ដោយ សេរី ។

ប្រព័ន្ធផ្សព្វផ្សាយ ជាពិសេសទូរទស្សន៍ចំនួន១១ក្នុងស្រុក មាននិន្នាការគាំទ្រគណបក្សកាន់អំណាច។ ទូរទស្សន៍រដ្ឋ មានចំនួនមួយ គឺទូរទស្សន៍ទទក តែក៏ត្រូវបានរិះគន់ថា ព័ត៌មានមានភាពលម្អៀងដែរ។ ទូរទស្សន៍ទាំង១១នោះ មានដូចជា ទូរទស្សន៍CNC CTN បាយ័ន SEATV អប្សរា ទូរទស្សន៍ប៉ុស្តិ៍លេខ៥ ប៉ុស្តិ៍លេខ៣ និងលេខ៩ជាដើម។

ប្រជាពលរដ្ឋ និងសង្គមស៊ីវិល បានរិះគន់ថា ទូរទស្សន៍ក្នុងស្រុកមួយចំនួនធំថា ផ្សាយព័ត៌មានមិនមានតុល្យភាពនិងមាននិន្នាការទៅ រកគណបក្សកាន់អំណាច។ តែទូរទស្សន៍ទាំងអស់នោះ លើកឡើងថា គេមានគោលការណ៍ផ្ទាល់ខ្លួនក្នុងការផ្សព្វផ្សាយ ។ ពលរដ្ឋ បានរិះគន់យ៉ាងខ្លាំងទៅលើអ្នកអត្ថាធិប្បាយតាមទូរទស្សន៍មួយចំនួន ដូចជាទូរទស្សន៍ស៊ីអ៊ិនស៊ី និងទូរទស្សន៍បាយ័នជាដើម ដែល ធ្វើឲ្យគេលែងចង់មើលទូរទស្សន៍ទាំងនោះទៀត។

កន្លងទៅ អង្គការចំនួន ៤០ នៃបន្ទប់ស្ថានការ៍ក្នុងថ្ងៃបោះឆ្នោត រកឃើញថា ប្រព័ន្ធផ្សព្វផ្សាយជាពិសេស ទូរទស្សន៍ និងវិទ្យុមាន ភាពលម្អៀងខ្លាំងបំផុតទៅកាន់គណបក្សប្រជាជនកម្ពុជា និងបានបំពេញតួនាទីមួយមួយកាន់តែអាក្រក់ទៅ សម្រាប់ការបោះឆ្នោតនៅ កម្ពុជា។ អង្គការទាំងនេះ ជំរុញឲ្យមានកំណែទម្រង់ប្រព័ន្ធផ្សព្វផ្សាយគោរពតាមគោលការណ៍សមធម៌ និងមានភាពសេរីដើម្បីឲ្យ ការបោះឆ្នោតក្រោយៗទៀត មានភាពសេរី និងយុត្តិធម៌ ។

ជាឧទាហរណ៍ កាលពីពេលប្រធានគណបក្សសង្គ្រោះជាតិ លោក សម រង្ស៊ី ត្រឡប់មកពីប្រទេសបារាំងវិញ មិនមានទូរទស្សន៍ ក្នុងស្រុកណា ហ៊ានផ្សព្វផ្សាយពីការវិលមកដល់នោះទេ។ ទូរទស្សន៍ទាំងនោះ លើកឡើងថា គេមានកាលវិភាគនៃការផ្សព្វផ្សាយ។

មិនទាន់មានការឆ្លើយតបយ៉ាងណាពី មន្ត្រីរដ្ឋាភិបាល ទាក់ទងនឹងការបង្កើតប្រព័ន្ធផ្សព្វផ្សាយឯករាជ្យ ជាពិសេសទូរទស្សន៍ឯក រាជ្យមួយ នៅឡើយទេ ៕ប្រភពដើមពី ខ្មែរម្ចាស់ស្រុក