រថយន្តដឹកឈើក្រញូង៣គ្រឿងត្រូវបានកម្លាំងអធិការនគរបាលស្រុកជីគ្រែងធ្វើការបង្ក្រាបបានខណៈពេលកំពុងបើកតាមផ្លូវជាតិលេខ៦បម្រុងឆ្លងកាត់ទៅខេត្តកំពង់ធំ ក្រោមបញ្ជារបស់ព្រះរាជអាជ្ញាសាលាដំបូងខេត្តសៀមរាប។
ប្រតិបត្តការបង្រ្កាបរថយន្តសេរីទំនើបដឹកឈើក្រញូងទាំង៣គ្រឿងនេះបានធ្វើឡើងនៅវេលាម៉ោង១រំលងអាធ្រាតក្នុងថ្ងៃទី២៤ខែតុលាឆ្នាំ២០១៣ នៅដងផ្លូវជាតិលេខ៦ជិតព្រំប្រទល់ខេត្តកំពង់ធំស្ថិតនៅឃុំល្វែងឬស្សីស្រុកជីគ្រែងខេត្តសៀមរាប ចំណែកម្ចាស់ឈើរត់បាត់ដោយមិនដឹងពីអត្តសញ្ញាណ។
មន្ត្រីនគរបាលស្រុកជីក្រែងដែលបានចុះបំពេញការងារបង្រ្កាបករណីរថយន្តដឹកឈើខាងលើបានឲ្យដឹងថា ការចុះបង្ក្រាបនេះបានធ្វើឡើងក្រោមការបញ្ជារបស់លោក សំរិទ្ធសុខុន ព្រះរាជអាជ្ញារងតំណាងអយ្យការសាលាដំបូងខេត្ត ដែលលោកបានបញ្ជាឲ្យប៉ូលីសដាក់ប៉ារាសកាក់រថយន្តដឹកឈើខាងលើដែលបម្រុងឆ្លងកាត់តំបន់ស្រុករបស់លោកគ្រប់គ្រង។
មន្ត្រីនគរបាលបានបន្តថាក្រោយពីលោកបានទទួលបញ្ជារួចមកលោកបានដាក់កម្លាំងចាំចាប់តែទម្រាំចាប់បានមានរយៈពេល២ម៉ោង ទើបឈានទៅដល់ចំណុចជោកជ័យ។មន្ត្រីនគរបាលដដែលបានបញ្ជាក់ថា រថយន្តដឹកឈើក្រញូងទាំង៣គ្រឿងពុំមានផ្លាកលេខទេ ទី១កាមរីបាឡែនព័ណខ្មៅ ទី២ហៃលេនឌ័រ និងទី៣លុចស៊ិសRX300ពណ៍ស្ករដែលសរុបឈើក្រញូងទាំងអស់មានចំនួន១២៨ដុំ ស្មើ១៨៩០គីឡូក្រាម ។ក្រោយធ្វើការវាស់វែងទាំងឈើនិងរថយន្តខាងប៉ូលីសបានបញ្ជូនឲ្យផ្នែករដ្ឋបាលព្រៃឈើជីក្រែង។
ព្រះរាជអាជ្ញារងអមសាលាដំបូងខេត្តសៀមរាបលោក សំរិទ្ធសុខុន បានថ្លែងឲ្យដឹងថា លោកបានមកពីភ្នំពេញក៍ប្រទះឃើញរថយន្តដឹកឈើក្រញូងខាងលើបើកបរបញ្ជាស់ទិសជាមួយរថយន្តលោកហើយដោយលោកមានការសង្ស័យ ភ្លាមៗនោះលោកក៍បានបញ្ជាកម្លាំងនគរបាលនៅស្រុកជីគ្រែងឲ្យជួយកាក់រថយន្តនោះដើម្បីធ្វើការត្រូតពិនិត្យ ប៉ុន្តែទម្រាំចាប់បានរយៈពេលជិត២ម៉ោង។
គេសង្កេតឃើញថា ក្នុងឆ្នាំ២០១៣ រយៈពេល១០ខែនេះមេព្រៃសៀមរាបនៅមិនទាន់បានបង្ហាញនូវស្នាដៃបង្ក្រាបសកម្មភាពបទល្មើសដឹកជញ្ជូនឈើក្រញូងបានមួយករណីនៅឡើយទេ។សកម្មភាពដឹកជញ្ជូនឈើក្រញូងមកពីស្រុកអន្លង់វែងខេត្តឧត្តរមានជ័យឆ្លងកាត់ខេត្តសៀមរាប ហាក់កើនឡើងដោយក្រុមឈ្មួញបានប្រើប្រាស់នូវរថយន្តសេរីទំនើបៗក្នុងការដឹកជញ្ជូនឈើបានដោយសុវត្ថិភាព មិនតែប៉ុណ្ណោះក្រុមឈ្មួញបានប្រើកាំភ្លើងបាញ់រថយន្តអ្នកកាសែត បុករថយន្តអ្នកកាសែតជាដើម។
សូមបញ្ជាក់ផងដែរថា រាល់បទល្មើសព្រៃឈើដែលសមត្ថកិច្ចបង្ក្រាបបានហើយបញ្ជូនទៅរក្សាទុកនៅផ្នែករដ្ឋបាលព្រៃឈើជីគ្រែងក្នុងស្រុកជីក្រែង ខេត្តសៀមរាប ដើម្បីអនុវត្តទៅតាមផ្លូវច្បាប់នោះលោកនាយផ្នែកឈ្មោះ សូ-ផល្លា តែងតែមានចេតនារារាំងមិនឲ្យអ្នកកាសែត ថតរូបរថយន្តដឹកឈើ មិនអោយថតរូបឈើដែលចាប់បាននោះឡើយធ្វើឲ្យមានការរិះគន់យ៉ាងខ្លាំងអំពីបញ្ហាទាំងនេះ។
ជាក់ស្តែងអ្នកកាសែត២រូបទៅសុំថតរូបរថយន្តដឹកឈើនិងឈើដែលចាប់បានខាងលើ តែត្រូវបានមន្រ្តីរដ្ឋបាលព្រៃឈើជីក្រែងរារាំងមិនអោយថតរូប សូម្បីតែលោក ថៃ-គឹមសុង នាយសង្កាត់រដ្ឋបាលព្រៃឈើជីក្រែងនេះក៏និយាយថា មិនហ៊ានអោយថតរូបដែរ អោយអ្នកកាសែតទូរស័ព្ទសុំការអនុញ្ញាតពីនាយផ្នែក តែលោកសូផល្លានាយផ្នែកមិនព្រមលើកទូរស័ព្ទតាំងពីម៉ោង១០ព្រឹករហូតដល់ម៉ោង២រសៀល។ អ្នកយកព័ត៌មានរូបនោះបានទូរស័ព្ទទៅនាយរងខណ្ឌ នាយខណ្ឌ ទើបលោកទាគឹមសុទ្ធនាយខណ្ឌអោយជិះរថយន្តបកពីស្រុកជីក្រែងមកយករបាយការណ៍នៅការិយាល័យដែលមានទីតាំងនៅសាលាខេត្តថ្មីឯក្រុងសៀមរាបវិញ។ គ្រាន់តែចំនួនឈើនិងចំនួនទម្ងន់ឈើក្រញូងដែលចាប់បាន អ្នកសារព័ត៌ត្រូវចំណាយពេលតាំងពីម៉ោង១០ព្រឹករហូតដល់ម៉ោង៤រសៀល និងចំណាយសាំងរថយន្តអស់ជាង១០លីត្រ ត្រឡប់ចុះឡើងក្នុងចម្ងាយផ្លូវជាង១០០គឺឡូម៉ែត្រ បើបែបនេះតើប្រទេសជាតិនិងក្លាយទៅជាយ៉ាងណាទៅថ្ងៃអនាគត់?
ប្រភពព័ត៌មានមិនយកជាផ្លូវការណ៍មួយបានលួចខ្សឹបប្រាប់អ្នកយកព័ត៌មានយើងថា សមត្ថកិច្ចបានដោះលែងឈើក្រញូងមួយចំនួនក្នុងចំណោមឈើដែលចាប់បានទាំងបីរថយន្តខាងលើ នេះជាហេតុដែលអស់លោកមេព្រៃខាងលើមិនអោយអ្នកកាសែតថតរូបឈើដែលចាប់បានខាងលើ។ (រូបដែលផ្សាយក្នុងអត្ថបទនេះជារូបភាពដែលអ្នកយកព័ត៌មានយើងព្យាយាមសុំពីប៉ូលីសសេដ្ឋកិច្ច ព្រោះមេព្រោះមិនអោយអ្នកកាសែតថតរូបទាំងនេះទេ)។
សូមលោកនាយករដ្ឋមន្រ្តីថ្មី ឬរដ្ឋាភិបាលថ្មីមេត្តា ចំណាយពេល១នាទីពិចារណាអំពីទង្វើរបស់អស់លោកមេព្រៃនៅខេត្តសៀមរាបផង កុំធ្វើអ្វីដែលវាអាក្រក់មើលពេក ហូសហេតុពេក ល្មមៗបានហើយទាន៕ដោយ៖ វិចិត្រ + រ៉េត
.jpg)
.jpg)
.jpg)
.png)
.jpg)
.jpg)
.jpg)
