ជនដៃដល់ជិត១០នាក់ដឹកឈើខុសច្បាប់ប្រើអំពើហឹង្សាលើចាងហ្វាងកាសែត កម្ពុជាសុវណ្ណភូមិ កាលពីវេលាម៉ោង៩និង៣០នាទី យប់ថ្ងៃទី១៧ ខែធ្នូ ឆ្នាំ២០១៣ នៅចំណុចភូមិអូរស្វាយ ឃុំអូរស្វាយ ស្រុកត្រពាំងប្រាសាទ ខាងត្បូងរង្វង់មូលអូរស្វាយប្រហែល៨រយម៉ែត។
លោក ផ្លុង-រ៉េត ចាងហ្វាងកាសែតកម្ពុជាសុវណ្ណភូមិបានអោយដឹងនៅព្រឹកថ្ងៃទី១៨ ខែធ្នូ ឆ្នាំ២០១៣នេះថា កាលពីវេលាខាងលើ មានរថយន្តម៉ាក ម៉ាស្តា២កឹប ពណ៍ទឹកប្រាក់ ពាក់ស្លាកលេខ ស្វាយរៀង 2A-0257 ដឹកឈើជាច្រើនឆ្លងកាត់រង្វង់មូលអូរស្វាយ សំដៅទៅស្រុកអន្លង់វែងតាមផ្លូវគ្រួសក្រហម ក្រុមហ៊ុនរ៉ែធ្យូង។ ដោយមានការសង្ស័យលោកបានបើរថយន្តម៉ាកកាមរីឆ្នាំ៩៣ មានគ្នា៤នាក់តាមពីក្រោយ ហើយស៊ីផ្លេហៅសាកសួរព័ត៌មាន តែគ្រាន់តែកូនចៅលោកចុះពីរថយន្តភ្លាមមិនទាន់បាននិយាយអ្វីផង ស្រាប់តែមានមនុស្សប្រុសប្រហែល៨នាក់ ស្លៀកពាក់ឈុតប៉ារ៉ា និងស្រីម្នាក់ស្លៀករូបបានរតមកវាយកូបចៅលោកដោយកណ្តាប់ដៃ។ ឃើញដូចឆ្នេះលោក រ៉េតបានចុះពីរថយន្តទាញកាមេរ៉ាបំរុងថតរូប តែត្រូវបានទាហ៊ាន២នាក់ដេញប្រវាយប្រតប់ក្នុងគោលបំណងឆក់យកកាមេរ៉ាបោកចោល តែលោកបានអោបកាមេរាជាប់ ទើបបណ្តាលអោយទាហ៊ានទាំងនោះចាប់លោកបោកទៅនិងដីគ្រួសក្រហមរហូតដាច់ដៃ ដាច់ជើងដូចក្នុងរូបភាព។ ក្រុមជនល្មើសដៃដល់ខាងលើបានស្រែកខ្លាំងៗថា ពួកអាអ្នកកាសែតឯងហ៊ានដេញឡានម៉េអឹមផងរឺ អញជាប៉េអឹម?
លោករ៉េតបានបន្តថា លោកបានខលទូរស័ព្ទទៅឯកឧត្តម នួន-នៅ នាយរងភូមិភាគ៤ អោយជួយអន្តរាគមន៍ ហើយឯកឧត្តមនួននៅថា បានទូរស័ព្ទអោយមេកងពលគេជួយចាប់ឡានខាងលើហើយ។ ហើយលោកក៏បានរាយការណ៍ទៅលោក តង រងម៉េអឹមស្រុកត្រពាំងប្រាសាទដែរតែអកុសល់ មេរបស់លោកតងប្រាប់ថា មិនមានកម្លាំងម៉េអឹមនៅស្នាក់ការទេ ព្រោះជាប់រវល់ទៅយាមឯក្រុមហ៊ុនឯកជនមួយ។
សហការីរបស់លោករ៉េតបានរាយការណ៍សុំអោយលោក យូ-ឧត្តម ពលទាហ៊ានវីរសេនាតូចលេខ៤១៣ សុំអោយជួយបិទបារាសឃាត់រថយន្តបង្កហេតុខាងលើតែលោកឆ្លើយថា លោកនៅឆ្ងាយ។ សហការីរូបនេះបានខលទូរស័ព្ទទៅលោក លី-ស្រេង មេវីរៈសេនាតូងលេខ៤១៣ជាច្រើនដងតែលោកមិនបានលើកទូរស័ព្ទទេ។
លោក ផ្លុង-រ៉េត ក៏បានខលទូរស័ព្ទរាយការណ៍ជូនទៅលោកព្រះរាជអាជ្ញាសាលាដំបូងខេត្តឧត្តរមានជ័យ២ដងដែរ តែលោកមិនបានលើកទូរស័ព្ទនៅបន្ទាប់ពីកើតហេតុភ្លាមៗ។
តាមការស៊ើបអង្កេតស្រាវជ្រាវ និងការបង្ហើបពីសមត្ថកិច្ច និងកងកម្លាំប្រដាប់អាវុធ នៅស្រុកអន្លង់វែង និងស្រុកត្រពាំងប្រាសាទបានអោយដឹងនៅព្រឹកថ្ងៃទី១៩ ខែធ្នូ ឆ្នាំ២០១៣នេះថា តាមភិនភាគរថយន្ត និងភិនភាគជនដៃដល់ដែលបានបង្កហេតុខាងលើនេះ គឺមានឈ្មោះ អនុសេនីយ៍ទោ សូ-វិបុល ជាប៉េអឹមប្រចាំទិស បញ្ជាការដ្ឋានកងរាជអាវុធហត្ថ ខេត្តឧត្តរមានជ័យ ស្នាក់ការសន្តិសុខ អ.206 (ស្នាក់ការខាងលើនេះគឺនៅជាប់ព្រំប្រទល់ខេត្តឧត្តរមានជ័យ និងខេត្តព្រះវិហារ)។ ប្រភពបន្ថែមថា រថយន្តដែលលោក អ.សូ-វិបុល ជិះបង្កហេតុខាងលើ គឺទិញពីអង្គការក្រៅរដ្ឋាភិបាល ដែលដាក់ស្លាកលេខអង្គការ តែជូនពេលខ្លះដូរដាក់ស្លាកលេខ ស្វាយរៀង 2A-0257 ដើម្បីដឹកឈើខុសច្បាប់។
លោករ៉េតបានបញ្ជាក់ថា លោកបានចុះស្រាវជ្រាវយកព័ត៌មានបទល្មើសឈើក្រញូងនៅអាស័យដ្ឋានខាងលើអស់រយៈពេលជិត១សប្តាហ៍កន្លងទៅហើយ ដែលជាហេតុធ្វើអោយក្រុមអ្នករកស៊ីដឹកឈើក្រញូងនៅតំបន់នេះ មានការខឹងសម្បាមិនសប្បាយចិត្តរហូត មានការបើកឡានឆាបចុះឆាបឡើងក្នុងការគំរាមកំហែង បំភិតបំភ័យ រហូតមានអ្នកយកឈ្មោះជាប៉ូលីសព្រំដែន យកកាំភ្លើងមកគំរាមកំហែងរូបលោកទៀតផង។
លោក ផ្លុង-រ៉េត សូមសំនូមពរទៅសមត្ថកិច្ចគ្រប់លំដាប់ថ្នាក់ក្នុងខេត្តឧត្តរមានជ័យមេត្តាជួយចាប់ជនដៃដល់មកផ្តន្ទាទោសទៅតាមផ្លូវច្បាប់ ជាពិសេស ឯកឧត្តម ពុធ-សារ៉ាន់ មេប៉េអឹមខេត្តឧត្តរមានជ័យ និងឯកឧត្តម សៅ-សុខា មេប៉េអឹមប្រចាំប្រទេសកម្ពុជា ឯកឧត្តម នួននៅ រងភូមិភាគ៤ ព្រោះតំបន់ខាងលើជាតំបន់ទាហ៊ានកាន់កាប់។ លោក ផ្លុង-រ៉េត កំពុងរៀបចំដាក់ពាក្យបណ្តឹងដើម្បីរកយុត្តិធម៌ទៅតាមផ្លូវច្បាប់ផងដែរ។
ឯកឧត្តមឧត្តមសេនីយ៍ សៅ-សុខា មេប៉េអឹមប្រចាំប្រទេសកម្ពុជាធ្លាប់បានសារភាពតាមកញ្ចក់ទូរទស្សន៍នៅពេលថ្មីៗនេះថា កន្លងមកពិតជាមានមន្រ្តីប៉េអឹមរកស៊ីបទល្មើសមែន តែឯកឧត្តមក៏បានសន្យាថា នឹងចាត់វិធានការទៅលើមន្រ្តីខិលខូចទាំងនេះ។
ពលរដ្ឋអ្នកតាមដានហេតុការណ៍ខាងលើរងចាំមើលចំណាត់ការរបស់ឯកឧត្តម សៅ-សុខា តើចាត់ការទៅលើលោក អ.សូ-វិបុល ដោយរបៀបណាដែរ ដើម្បីជៀសវាងគេរិះគន់ដល់ស្ថាប័នកងរាជអាវុធហត្ថ ប្រចាំប្រទេសកម្ពុជាទាំងមូល។
អ្នកយកព័ត៌មានយើងពុំទាន់អាចសុំការបំភ្លឺពីលោក សូ-វិបុល បានទេព្រោះទូរស័ព្ទមិនចូល៕ សៀ-វិចិត្រ
.jpg)
.jpg)
.jpg)
.png)
.jpg)
.jpg)
