អាគារខ្ពស់សន្លឹមសាងសង់គ្មានច្បាប់អនុញ្ញាត យកឈ្មោះអ្នកធំ២នាក់មកប្រើ

អាគារមួយខ្នង​សាង​សង់ជិតរួច​រាល់ដោយ​គ្មាន​ច្បាប់​អនុញ្ញាតអ្វីបន្តិចសោះ ស្ថិត​ក្នុងភូមិ​ស្ទឹងថ្មី​ សង្កាត់ស្វាយដង្គំ ក្រុង​សៀមរាប ហើយ​ម្ចាស់​អាគារឈ្មោះលោកស្រី ហ៊ុយ នីន ​បាន​យកឈ្មោះ​អ្នក​ធំ២នាក់​មក​ធ្វើ​ជាខ្នង​បង្អែក​ក្នុង​ការ​បន្លាច​សមត្ថកិច្ច​ពាក់ព័ន្ធនៅក្នុងខេត្ត។

កាលពីរសៀលថ្ងៃទី១១ ខែមិនា ឆ្នាំ២០១៩ម្សិលមិញ សមត្ថកិច្ចពាក់ព័ន្ធមួយចំនួនដូចជាលោក ពូ សុជា ប្រធានការិយាល័យ​លំនៅដ្ឋាន លោក ឆយ គឹមឆេង ខាងអន្តរវិស័យខេត្ត និង​លោក​មេភូមិ​មេឃុំ បានចុះ​ដល់​កន្លែង​សាងសង់ ហើយ​សុំមើល​លិខិតស្នាម​ក្នុងការ​សាសង តែអ្វីដែល​ហួស​ថ្លែងនោះគឺ ប្អូនស្រីម្ចាស់ផ្ទះឈ្មោះ ឃួន ដានីន បាន​ប្រាប់​ថា គាត់​អត់​មាន​ច្បាប់​អ្វីទេ មាន​តែ​​លិខិត​មួយ​ច្បាប់​របស់រដ្ឋ​បាល​សាលាខេត្តសៀមរាប ដែលចុះហត្ថលេខាដោយ ឯកឧត្តម​ លី សំរិទ្ធ នៅថ្ងៃទី២៩ ខែសីហា ឆ្នាំ២០១៨ ដែលមានអត្ថន័យឃ្លា​ចុងក្រោយដូចតទៅ ” ពាក់ព័ន្ធ​នឹង​ករណីនេះ សូម​លោក​ស្រី​រៀប​ចំប្លង់ស្ថាបត្យកម្ម​ស្រប​តាម​បច្ចេកទេស​ត្រឹមត្រូវ និង​ស្រប​តាម​ទម្រង់ដីរបស់លោក​ស្រី​ជាក់ស្តែង​ រួច​ដាក់​ពាក្យ​ស្នើ​សុំ​លិខិត​អនុញ្ញាតសាង​សង់​មក​រដ្ឋ​បាល​ខេត្ត​ជាមុន​សិន មុន​នឹង​ធ្វើ​ការ​សាង​សង់“  តែលោកស្រី ហ៊ុយ នីន មិន​បាន​ទៅសុំច្បាប់​សាងសង់តាម​ការ​នែនាំរបស់សាលាខេត្តទេ ហើយថែមទាំងយកឈ្មោះអ្នកធំមកបន្លាចគេឯងទៀត។

បើយោង​តាម​សម្តីប្អូនស្រីលោកស្រី ហ៊ុយ នីន ឈ្មោះ ឃួន ដានីន បាន​ប្រាប់​សមត្ថកិច្ច និង​អ្នក​កា​សែតកាល​ពី​រសៀល​ម្សិល​មិញថា កាលពីរដ្ឋ​ធ្វើ​ផ្លូវ​ទំលុះផ្សាររាត្រីផល្លាអង្គរ ប៉ះចំផ្ទះរបស់គាត់​ប្រហែល​មួយម៉ែត្រ ហើយ​បាន​វៃចោលជ្រុងផ្ទះដែលប៉ះផ្លូវ បន្ទាប់​មក​បងស្រីគាត់​បាន​សុំទៅ​សម្តេច​​ពីជ័យសេនា ទៀ បាញ់ និង​ឯកឧត្តម​ ឃឹម ប៊ុនសុង ដើម្បីសាងសងផ្ទះ​ឡើង​វិញ ហើយ​សម្តេច​ពិជ័យសេនា ទៀ បាញ់ និង​ឯកឧត្តម​ ឃឹម ប៊ុនសុង បាន​ប្រាប់​ថា អោយ​សាងសង់វិញចុះ ទើប​ពួកគាត់​ហ៊ានសាងសង់ផ្ទះដូច​ក្នុង​រូប​ភាពនេះ។

ខាងសមត្ថកិច្ច​ពាក់ព័ន្ធ​ដែល​ចុះ​ត្រួតពិនិត្យ​​អាគារ​កំពុង​សាងសង់​អត់​ច្បាប់​នេះ​ បាន​ប្រាប់​អ្នក​កាសែត​​កម្ពុជា​សុវណ្ណភូមិថា តាម​ការ​កំណត់​នៅក្នុង​ខេត្តសៀមរាប អាគារ​ដែល​ខ្ពស់​បំផុត​គឺ​ត្រឹម​តែ ១៤ម៉ែត្រប៉ុណ្ណោះ ឯអាគារបស់​លោកស្រី ហ៊ុយ នីន មាន​កំពស់​ដល់ទៅ ១៩ម៉ែត្រ ហើយ​ថែម​ទាំង​មិន​មាន​ច្បាប់​សាងសង់ទៀតផង។

លោកស្រី ហ៊ុយ នីន បាន​យក​ឈ្មោះថ្នាក់​ដឹកនាំធំៗពីររូបខាងលើ​​មក​បន្លាចក្រុម​សមត្ថកិច្ច​ពាក់​ព័ន្ធ​នៅ​ក្នុង​ខេត្តសៀមរាប ធ្វើ​អោយ​សមត្ថកិច្ច​គ្រប់​ជាន់ថ្នាក់រួញ​កដូច​អណ្តើក​ក្នុង​ស្នូក មិន​ហ៊ាន​ចុះ​អនុវត្ត​ទួនាទីរបស់​ខ្លួន​ទៅ​តាម​ផ្លូវ​ច្បាប់​។

ពលរដ្ឋ​ដែល​ដឹងរឿង​ករណីសាងសង់ផ្ទះ​អត់ច្បាប់ ហើយខ្ពស់ហួសការកំណត់​ខាងលើនេះ បានរិះគន់ថា បើមន្ត្រីអនុវត្តច្បាប់​ ខ្លាច​អំណាច​អ្នកធំដូច្នេះ ចាំបាច់​បង្កើត​ច្បាប់​មក​ធ្វើ​អី មេច​មិន​​ដុត​សៀវ​ភៅ​ច្បាប់​ចោល​អោយអស់ពី​ប្រទេស​កម្ពុជាទៅ ហើយ​រំលាយ​តុលាការ​គ្រប់​ជាន់​ថ្នាក់​ចោទទៅ ដើម្បី​អោយ​អ្វីៗវាស្មើភាពគ្នា ជាពិសេសក្រសួង និង​​មន្ទីររៀបចំ​ដែនដី នគរូបនីយកម្ម និងសំណង គួរ​តែ​រំលាយចោល ព្រោះមិន​ហ៊ាន​ធ្វើ​ការ​តាម​ផ្លូវ​ច្បាប់ចំពោះ​អ្នក​មាន​ ឬអ្នក​មាន​ខ្សែ​ស្រ​ឡាយ​អ្នក​ធំ អនុវត្ត​បាន​តែអ្នក​ក្រតូច​តាម​អត់​អំណាច​យ៉ាង​ដូច្នេះ៕ ដោយ៖ ផ្លុងរ៉េត