ចិនចេញមុខការពារខ្លួនពីការចោទប្រកាន់របស់អាមេរិកចំពោះទំនាក់ទំនងយោធាជាមួយកម្ពុជា

មន្ត្រី​ការបរទេសចិន​បានចេញមុខ​ការពារ​ខ្លួន​ចំពោះ​ការ​ចោទ​ប្រកាន់​របស់​សហរដ្ឋអាមេរិក អំពី​ទំនាក់ទំនងយោធា​ជា​មួយ​កម្ពុជា ពិសេសលើការព្រួយបារម្ភចំពោះវត្តមានកងទ័ពចិន​នៅក្នុងប្រទេសអាស៊ីអាគ្នេយ៍មួយនេះ។ ការ​ចេញ​មុខ​អះអាងជាថ្មី​របស់​ភាគីចិន ​គឺធ្វើ​បន្ទាប់ពី​មានការ​លើកឡើង​​របស់​ អនុរដ្ឋមន្ត្រីការបរ​ទេស​អាមេរិក​ នៅចំពោះ​មុខ​ប្រមុខ​រដ្ឋាភិបាល​កម្ពុជា អំ​ពីការ​សាងសង់​មូដ្ឋានទ័ពចិន​នៅសមុទ្ររាម ​ខេត្តព្រះសីហនុ។

ទំនាក់ទំនងរវាងចិន និងកម្ពុជាបានរួមចំណែក ធ្វើឲ្យមានសន្តិភាព និងស្ថិរភាពក្នុងតំបន់។ នេះជាការអះ​អាង​របស់អ្នកនាំពាក្យ​ក្រសួង​ការបរទេសចិន កាលពីថ្ងៃព្រហស្បតិ៍ ក្នុង​សន្និសិទ​កាសែត​ប្រចាំ​ថ្ងៃ​របស់​ខ្លួន ដែលដកស្រង់មក​ចុះផ្សាយដោយទីភ្នាក់ងារ​សារព័ត៌មាន​​AP។

អ្នកនាំពាក្យក្រសួងការបរទេសចិន លោក Wang Wenbin បាននិយាយថា ប្រទេសចិន និងកម្ពុជារីករាយនឹងមិត្តភាពប្រពៃណី និងជាដៃគូយុទ្ធសាស្ត្រ និងកិច្ចសហប្រតិបត្តិការគ្រប់ជ្រុងជ្រោយ។

បើតាមអ្នក​នាំពាក្យ​ការបរទេសចិនរូបនេះ ភាគីទាំងពីរបានធ្វើកិច្ចសហប្រតិបត្តិការ ប្រកបដោយផ្លែផ្កាលើ​វិស័យផ្សេងៗ និងបាននាំមកនូវផលប្រយោជន៍ជាក់ស្តែងដល់ប្រជាជននៃប្រទេសទាំងពីរ ហើយបានចូលរួមចំណែកជាវិជ្ជមានដល់សន្តិភាព និងស្ថិរភាពក្នុងតំបន់។

ការ​ចេញ​មុខ​អះអាងជាថ្មី​របស់​ភាគីចិនបែបនេះ ​​គឺ​បន្ទាប់ពី​មានការ​លើកឡើង ​របស់​អនុរដ្ឋមន្ត្រីការបរ​ទេស​អាមេរិក លោកស្រី Wendy Sherman នៅចំពោះមុខ លោកនាយករដ្ឋមន្ត្រី ហ៊ុន សែន កាលពីថ្ងៃអង្គារ អំពីការ​សាងសង់​មូដ្ឋានយោធាចិន​នៅសមុទ្ររាម​ ខេត្តព្រះសីហនុ។

មន្ត្រី​ការទូតជាន់ខ្ពស់​អាមេរិករូបនេះ សំដែងជា​កង្វល់ថា​ សកម្មភាព​យោធា​របស់​ចិន ​នៅ​មូលដ្ឋាន​កងទ័ព​ជើង​ទឹក​រាម ​ធ្វើ​ឲ្យ​ប៉ះពាល់​ដល់​អធិបតេយ្យភាព​កម្ពុជា គំរាមកំហែង​សន្តិសុខ​តំបន់ និង​ប៉ះពាល់​ជា​អវិជ្ជមាន​ដល់​ទំនាក់ទំនង​រវាង​កម្ពុជា និង​សហរដ្ឋអាមេរិក។ លោកស្រី​ ថែមទាំង​ជំរុញ​មេដឹកនាំ​កម្ពុជា​ឲ្យ​រក្សា​គោលនយោបាយ​ការបរទេស​ប្រកប​ដោយ​តុល្យភាព និង​ឯករាជ្យ។

ឆ្លើយតបនឹង​ការ​លើក​ឡើង​ម្តងហើយ​ម្តង​ទៀត​ពីបញ្ហាមូលដ្ឋាន​កងទ័ពចិន​នៅកម្ពុជានេះ ប្រមុខ​ការពារជាតិ​កម្ពុជា លោក ទៀ បាញ់ នៅ​ថ្ងៃទី៣ មិថុនា ក៏បានអះអាងថា កម្ពុជានឹង​អនុញ្ញាតឲ្យ​អនុព័ន្ធ​យោធា​អាមេរិក​ចុះ​ពិនិត្យ​ទីតាំង​កំពង់ផែ​រាមដោយ​ផ្ទាល់ ដើម្បី​ជំរៈ​មន្ទិល​សង្ស័យ​ពី​វត្តមាន​មូលដ្ឋានកង​ទ័ព​ចិន៕

ប្រភពព័ត៌មានៈ RFI